Lè lanmou ka kryé-w, fò ou maché dèyè-y Menm si ou sav chimen la rèd é ho.
É lè lanmou wouvè zèl-ay épi vlopé-w
Fo ou bésé tèt é lésé-y fè zafè-y
Menm si flèch-la ki kaché an zèl-ay pé blésé-w.
É lè lanmou ka palé ba-w fò ou akwè-y
Menm si vwa-ay pé chouboulé tout lidé-aw Kon ou ja vwè on van lanmè krazé jaden.
Padavwa
jan lanmou ké mété on kouwòn si tèt-aw
sé menm jan i ké mété dé klou an dé men-aw
dé klou an dé pyé-aw !
Padavwa jan lanmou ka fè-w pousé
sé menm jan i ka tayé fétay-aw.
Padavwa jan lanmou ké pran mizi a hotè-aw
É karésé branch pyébwa a kò-aw ka tranblé an solèy
Sé menm jan i ké désann andidan an rasin a kò-aw
É soukré fondasyon andidan latè kò-aw.
Lanmou ka sanblé nonm kon fanm ka sanblé kann.
Lanmou ka fwisòné-w pou mété-w toutouni.
Lanmou ka fariné-w é lanmou ka pétri-w
Avè i ka dwété-w pou difé sakré-ay
Pou-w pé sa divini pen sakré pou fèt sakré a Bondyé.
Lanmou ké fè-w tousa pou-w pé apran kònèt sa ki an fondkyè-aw
Pou lè ou ni lakonésans ou divini on mòso a kyè a lavi-menm.
Men...
Lakrentitid, sé lapé épi plézi lanmou tousèl ou ka chaché touvé
Kifè...
Pétèt...
Vomyétan ou abiyé kò-aw é pasé chimen-aw
asi chimen lanmou
É pran chimen péyi-santan la ou pé ké ri tout ri kò-aw tini andidan-ay
É pran chimen péyé-santan la ou pé ké pléré tout pléré kò-aw tini andidan-ay.
Lanmou ka bay blès é géri blès
Lanmou pa kay sav posédé-w menm jan ou pé pa posédé-y
Pas lanmou sifi lanmou.
Lè ou enmé
Fo pa ou di : Bondyé an kyè an mwen
Men fo-w di : Mwen an kyè a Bondyé
É pa kwè ou pé menné lanmou
Pas an final-dè-kont sé lanmou ké menné-w...
Si-y di ou vo lapenn.
Sèl anvi lanmou tini
Sé rivé an bout a chimen-ay
Men si-w vé aprann
Mi sa pou-w dwètèt konpwann :
Fo-w koulé kon rivyè ka chanté pou lannuit
Fo-w konèt chaj lapenn twòp tandrès pé poté-w
Fo-w aksepté démasyé a lanmou pé blésé'w
É sènyé avè lakontantman.
Fo-w lévé lématen
Kyè-aw lou kon ti-fèy papyé
É di mèsi Bondyé pou on dòt jou lanmou
Ki ka wouvè douvan-w.
Fo-w pozé anmitan lajouné é sonjé jan lanmou ka bay fòs
Fo-w rantré akaz avè bèl soulajman
É pran sonmèy
On ti priyè pou lanmou-aw anfenfon-aw
On ti chanson louanj lanmou si bò bouch-aw.
(Chalviraj a Le prophète a misyé Kahlil Gibran : L'amour)