ISTIV !
An sav ou ka dòmi gason ;
sé pousa an ka pran lanvòl
travèsé lanmè pou vin chwichwi on ti pawòl an zòrèy a-w ;
fè sédétimo-lasa lolé deep-deep andidan sonmèy a-w ;
ès ou ka tann lèspri an mwen ka palé ba-w ?
sé on ti sonj an tini pou pòté-w ;
sonjé :
piti gason ;
lè men a-w té adan tanmwen pou ay gadé gwo karavèl monté an gran solèy ;
jenn gason ; lè an touvé’an pè pou lendèmen a-w ;
lè an touvé’an pè douvan tousakitékadéboulé mòn a lavi ;
twoprésétwoprésé ;
garé ?
awa !
mi tan a nonm a-w té ja ka détòtiyé lyannaj an nou ;
laji chimen pou ba'w pasé ;
lésé’w rantré adan tala osi :
papazanfan !
misésa ;
ou ja papazanfan !
di mwen kijan ou rivé mòfwazé ?
ès ou pran tan gadé mòfwazaj a-w ?
sa la ; yo mèt sa la ; ou tini sa pou fè ;
pon moun pa di-w ayen ;
ou rédi men ; pousé pòt-la, rantré ;
misésa ;
gadé ! on gran chanm vid é sé vou pou plen-y ;
on gran chanm an nwèsè é sé-w pou pòté limyè ;
mi sa an ni pou di-w gason :
DÉ-présé ; frenné ; istopé balan a-w
avè gadé ; pran tan sonjé
ki koulè a limyè ou ké chwazi ba toupiti
pou kléré chimen a-w, chimen a zòt.
Èvè pa frapé, pa krent
mi nou la ; nou pa présé pati ; nou la
ki mwen, ki manman-w
nou la
nou dèyè-w kon gadbayè
awa, awa, nou pa dèyè
nou anlè ; sé lèspri an nou pou'w véyé
lanmè paka baré nou
lanmò pé ké baré nou
nou ké la ; nou ké la ;
nou tout la.